არიფანა

ფავორიტებში დამატება

სოფლელი გოგო-ბიჭების გულგასახარი გასართობი არიფანა იყო. ვარდობისთვის ერთ ლამაზ დღეს ვინ კვერცხებს გამოტანდა, ვინ მაწონსა და ყველს, ვინ ხახვსა და ნიორს, ვინ პურსა და ღვინოს. ერთი სიტყვით, ვისაც რისი შესაძლებლობა ჰქონდა, იმას გამოტანდა. გაშლიდნენ საძმო სუფრას სადმე ბაღში ან ვინმეს კალოზე, დაწყობდნენ თავიანთ წილ ხორაგს და იწყებოდა ქეფი და მოლხენა.

სუფრა უკვე გაშალათ მერიფანეთ, გოგლა რომ მოვიდა. თავისი კუთვნილი ხორაგი ერთ კუთხეში დაახვავა და ორღობეს გახედა. ვარო და მისი პატარა ძმა ნიკა მობუზულები მიმსხდარიყვნენ ღობის ძირას და სახე ჩამოსტიროდათ.

- მანდ რასა სხედხართ? - გასძახა გოგლამ.

- განებე თავი, მაგათ არაფერი არ მოტანიათ, - უთხრა ფაშიამ.

გოგლა გაენთო მაკო დედას სახლისკენ, აქოშინებული ავარდა კიბეზე და:

- დედა მაკო.

- რაო, თავს შემოგევლოს დედა.

- არიფანა გავმართეთ და ვაროსა და ნიკას არ უშვებენ, არაფერი მოტანიათო.

- ჰო, ისინი ძალიან ხელმოკლედა ცხოვრობენ, ჩემო სულისდგმავ, სახლში მჭადის ნატეხიც არ უდევთ. რას გამოტანდნენ. მოცა, შენ დაგენაცვლე, - უთხრა და შებრუნდა. დიდი ქათქათა ხელსახოცი გაშალა მაგიდაზე, ზედ ქილა თაფლი დადგა, კვერცხები და ყველის მოზრდილი ნაჭერი დადო, პურებიც დალაგა, მერე ხელსახოცის ორ-ორი წვერი ერთად გამონასკვა და მიწოდა გოგლას.

- აჰა, წაღე, ეს იმათი წილია-თქო, უთხარი გოგო-ბიჭებს, ჩემო სანდომელავ!

გოგლამ გაშლილ სუფრაზე დაწყო მიტანილი სანოვაგე და ამაყად გამოცხადა:

- ეს ვარდოსა და ნიკას წილია! - მერე დაღონებულ და-ძმასთან მივიდა, - რაღას უდგახართ, წამოდით, ლხინი იწყება...

ჟივილ-ხივილით შემოუსხდნენ გოგო-ბიჭები საძმო სუფრას.

რა ასაკის ბავშვისთვისაა ეს მოთხრობა საინტერესო?

როგორ ფიქრობთ, რა ასაკის ბავშვისთვის არის ეს მოთხრობა საინტერესო?


ფავორიტებში დასამატებლად უნდა შეხვიდეთ სისტემაში.
ხოლო თუ ჯერ არ გაქვთ გახსნილი ანგარიში kids.ge-ზე, გაიარეთ რეგისტრაცია