ყველას შეუძლია მოიგონოს ის დრო, როცა ჩვენი დედები გვიყვებოდნენ ზღაპრებს. დედაჩემმა ერთხელ გაიხსენა, რომ როცა ბავშვობაში ზღაპარს მიკითხავდა, მე ვაწყვეტინებდი: „ მასე კი არა, ასე უნდა,” და ვუყვებოდი ჩემს მიერ გამოგონილ ამბავს. დედა მეუბნებოდა: „მე სიამოვნებით გისმენდიო“. ჩემი პირველი ზღაპარი, რომელიც დედას წავუკითხე, ისე მოეწონა, რომ მთხოვა: “მარტო ჩემთვის მოიგონე ზღაპრებიო,” და მეც მას ვუძღვნი...

მე საბავშვო მოთხრობების გამოქვეყნება 2015 წელს დავიწყე. პროფესიით ექიმი ვარ, ამასთანავე, ცხოველების მოყვარული და  მათი თავგამოდებული დამცველი. ფიზიოლოგიის სწავლის დროს, ექსპერიმენტები ბაყაყებზე, თაგვებზე, ბოცვრებზე და ძაღლებზე მიუღებლად მიმაჩნდა. მერე გავხდი ეთიკის მასწავლებელი და ასე გავაგრძელე გაუმართლებელ ექსპერიმენტების წინააღმდეგ ბრძოლა.

გადავწყვიტე  ბავშვებისთვის დამეწერა  ძალიან საყვარელი ცხოველების შესახებ, რომ მათი დაცვის სურვილი გასჩენოდა ყველას.  ჩემი სხვა  ზღაპრებიც იმისთვის შეიქმნა, რომ ბავშვებმა გაიცნონ იშვიათი და საფრთხის ქვეშ მყოფი სულიერი არსებები და უფრო მეტად შეიყვარონ ჩვენი დედამიწის უსაზღვროდ მრავალფეროვანი და ნაირსახოვანი ბუნება.