ჩვენი ღირებულებები
Kids.ge-ის საქმიანობის საფუძველი ბავშვის უფლებების, ღირსებისა და საუკეთესო ინტერესების დაცვაა.
ეს პრინციპი განსაზღვრავს იმას, როგორ ვქმნით საგანმანათლებლო პროგრამებს, როგორ ვურთიერთობთ ბავშვებთან და მშობლებთან, როგორ ვამზადებთ ჩვენს რესურსებს და როგორ ვიღებთ ყოველდღიურ გადაწყვეტილებებს.
ჩვენთვის ბავშვი არ არის მხოლოდ ცოდნის მიმღები. იგი არის დამოუკიდებელი პიროვნება - საკუთარი ინტერესებით, შესაძლებლობებით, ემოციებით, აზრებითა და განვითარების უნიკალური გზით.
ჩვენი მიზანია შევქმნათ გარემო, სადაც ბავშვი თავს გრძნობს უსაფრთხოდ, მიღებულად და თავისუფლად, შეუძლია დასვას კითხვები, დაუშვას შეცდომები, გამოხატოს საკუთარი აზრი, სცადოს, აღმოაჩინოს და განვითარდეს მისთვის ბუნებრივი ტემპით.
ჩვენთვის თანაბრად მნიშვნელოვანია მშობლების მხარდაჭერაც. გვინდა, მათ ჰქონდეთ სანდო ინფორმაცია და უკეთესი შესაძლებლობა, გაიგონ ბავშვის განვითარების პროცესები, დაინახონ მისი ძლიერი მხარეები და დაეხმარონ მას იქ, სადაც მხარდაჭერა სჭირდება.
ჩვენი ძირითადი ღირებულებები
ბავშვის უფლებები და საუკეთესო ინტერესი
ნებისმიერი გადაწყვეტილებისას პირველ რიგში ვეკითხებით საკუთარ თავს - რა არის უკეთესი ბავშვისთვის?
ჩვენ პატივს ვცემთ ბავშვის ღირსებას, პირად სივრცეს, აზრს, ემოციებსა და ინდივიდუალურ თავისებურებებს.
ბავშვის უსაფრთხოება, კეთილდღეობა და უფლებების დაცვა ყველა სხვა მიზანზე მაღლა დგას.
თავისუფლება და დამოუკიდებლობა
ბავშვს უნდა ჰქონდეს შესაძლებლობა, გააკეთოს არჩევანი, გამოთქვას საკუთარი აზრი, სცადოს განსხვავებული გზები და შეცდეს.
ჩვენ შეცდომას არ ვუყურებთ როგორც წარუმატებლობას - ის სწავლის ბუნებრივი ნაწილია.
ვცდილობთ შევქმნათ გარემო, სადაც ბავშვი არ ელოდება მხოლოდ უფროსისგან „ სწორ პასუხს “ , არამედ სწავლობს საკუთარ შესაძლებლობებზე დაყრდნობას, გადაწყვეტილებების მიღებას და პასუხისმგებლობის თანდათან აღებას.
ცნობისმოყვარეობა და აღმოჩენა
ბავშვები ბუნებრივად სვამენ კითხვებს - რატომ? როგორ? რა მოხდება, თუ...?
ჩვენთვის კარგი სწავლება სწორედ აქედან იწყება.
ვცდილობთ ბავშვს მხოლოდ მზა პასუხები კი არ მივაწოდოთ, არამედ გავუჩინოთ სურვილი, თვითონ გამოიკვლიოს, იფიქროს, შეადაროს, გამოსცადოს და აღმოაჩინოს.
ამიტომ ჩვენს მიდგომებში მნიშვნელოვანი ადგილი უჭირავს პრობლემაზე დაფუძნებულ სწავლებას, კვლევას, თამაშს, ექსპერიმენტს და ბავშვის აქტიურ მონაწილეობას.
შემოქმედებითი აზროვნება
ჩვენ გვჯერა, რომ შემოქმედება მხოლოდ ხატვა, მუსიკა ან ხელოვნება არ არის.
შემოქმედებითი აზროვნება ნიშნავს უნარს, დაინახო რამდენიმე შესაძლებლობა, მოძებნო განსხვავებული გამოსავალი, შექმნა ახალი კავშირები და საკუთარი იდეა რეალურ ფორმად აქციო.
ჩვენ ვაძლევთ ბავშვებს შესაძლებლობას, იმუშაონ სხვადასხვა მასალითა და მეთოდით, მოსინჯონ საკუთარი იდეები და იპოვონ პრობლემის გადაჭრის საკუთარი გზა.
ჩვენთვის მნიშვნელოვანია არა ის, რომ ყველა ბავშვმა ერთნაირი შედეგი მიიღოს, არამედ ის, რომ თითოეულმა შეძლოს საკუთარი შესაძლებლობების აღმოჩენა და განვითარება.
ბავშვის ჰარმონიული განვითარება
ბავშვის განვითარება მხოლოდ აკადემიური ცოდნა არ არის.
ჩვენ თანაბრად მნიშვნელოვანად მივიჩნევთ:
- შემეცნებით განვითარებას;
- სოციალურ და ემოციურ განვითარებას;
- კომუნიკაციის უნარებს;
- დამოუკიდებლობას;
- შემოქმედებით აზროვნებას;
- ფიზიკურ განვითარებას;
- საკუთარი ემოციებისა და ქცევის მართვის უნარს.
ვცდილობთ ბავშვის განვითარებას მთლიან პროცესად შევხედოთ და არ შევაფასოთ იგი მხოლოდ იმის მიხედვით, რამდენად კარგად კითხულობს, წერს ან ითვლის.
ინდივიდუალური განსხვავებების პატივისცემა
ყველა ბავშვი განსხვავებულია.
ბავშვები განსხვავებული ტემპით ვითარდებიან, განსხვავებული ინტერესები, ძლიერი მხარეები და საჭიროებები აქვთ.
ჩვენ არ ვცდილობთ ბავშვები ერთმანეთს დავამსგავსოთ.
ჩვენთვის მნიშვნელოვანია დავინახოთ კონკრეტული ბავშვი - რა გამოსდის კარგად, რა აინტერესებს, სად სჭირდება მხარდაჭერა და რა გარემოში შეუძლია საკუთარი შესაძლებლობების უკეთ გამოვლენა.
მშობელთან პარტნიორობა
მშობელი ბავშვის განვითარების ყველაზე მნიშვნელოვანი თანამონაწილეა.
ამიტომ ჩვენთვის მშობელთან ურთიერთობა მხოლოდ ინფორმაციის მიწოდება არ არის - ეს არის პარტნიორობა.
ვცდილობთ მშობლებს მივაწოდოთ გასაგები და სანდო ინფორმაცია ბავშვის განვითარების შესახებ, დავეხმაროთ მათ უკეთ დაინახონ ბავშვის საჭიროებები და ძლიერი მხარეები და შევქმნათ ერთიანი მიდგომა ბავშვის მხარდასაჭერად.
ჩვენ არ გვჯერა მშობლის განსჯის ან „ სწორი აღზრდის “ ერთი უნივერსალური ფორმულის. გვჯერა ინფორმირებული, ყურადღებიანი და ბავშვის საჭიროებებზე ორიენტირებული მშობლობის.
ცოდნაზე დაფუძნებული მიდგომა
ჩვენი საგანმანათლებლო და განვითარების მეთოდები არ ეფუძნება მხოლოდ ტრადიციას ან პირად შეხედულებებს.
ვცდილობთ გადაწყვეტილებები დავაფუძნოთ თანამედროვე სამეცნიერო ცოდნაზე, ბავშვის განვითარების კვლევებზე და პროფესიულ გამოცდილებაზე.
ამავე დროს გვესმის, რომ განათლება მუდმივად ვითარდება. ამიტომ მზად ვართ გადავხედოთ საკუთარ მიდგომებს, ვისწავლოთ ახალი და შევცვალოთ ის, რაც უკეთესი ცოდნის ფონზე გაუმჯობესებას საჭიროებს.
რას გვინდა ვქმნიდეთ
ჩვენ გვინდა Kids.ge იყოს სივრცე, სადაც ბავშვს არ ეუბნებიან მხოლოდ რა უნდა იცოდეს, არამედ ეხმარებიან გაიგოს, როგორ იფიქროს, როგორ აღმოაჩინოს და როგორ შექმნას.
სივრცე, სადაც შეცდომის დაშვება შეიძლება, კითხვა ფასობს, განსხვავებული აზრი მისაღებია და ბავშვის ინდივიდუალობა პატივისცემას იმსახურებს.
ჩვენი მიზანია, ბავშვებს ჰქონდეთ შესაძლებლობა გაიზარდონ ცნობისმოყვარე, დამოუკიდებელ, შემოქმედებით და საკუთარ შესაძლებლობებში დარწმუნებულ ადამიანებად - გარემოში, სადაც მათი უფლებები, კეთილდღეობა და პიროვნული ღირსება ყოველთვის დაცულია.
