ნანა გასვიანი დაიბადა ქალაქ ცაგერში. დაამთავრა ქუთაისის 33-ე საშუალო სკოლა და მუსხელიშვილის სახელობის ქუთაისის პოლიტექნიკური ინსტიტუტი.

მისი პირველი ლექსი დაიბეჭდა საქალაქო გაზეთში - „ქუთაისი“, შემდგომში კი იბეჭდებოდა ლიტერატურულ პერიოდიკაში, მათ შორის ჟურნალებში „განთიადი“, „მნათობი“,  „ლიტერატურულ გაზეთი“ და სხვ.

არის ხელოვანთა კავშირის „მარიოტა“ (1999) თანადამფუძნებელი და 2003 წლიდან მისი პრეზიდენტი. იყო აღნიშნული კავშირის სალიტერატურო ჟურნალ „ი/ა“-ს რედაქტორიც.

ნანა გასვიანს გამოცემული აქვს პოეტური კრებულები „მებოძირი“ (2006), „რაც მზის წინ იყო“ (2017), რომელიც ლიტერატურული კონკურსის, „ლიტერას“ ფინალისტი გახდა (წიგნის ელექტრონული ვერსია განთავსებულია „საბას“ გვერდზე); არის საბავშვო ლექსების წიგნის, „ლილეს“, თანაავტორი და რედაქტორი; 80-90-იანი წლების ქუთაისის ლიტერატურული თაობების ანთოლოგიის შემდგენელი და ერთ-ერთი რედაქტორი.

არის მილან კუნდერას, ხორხე ლუის ბორხესის, ვლადიმერ ნაბოკოვის და სხვათა თარგმანების ავტორი, რომლებიც სხვადასხვა დროს იბეჭდებოდა ლიტერატურულ ჟურნალ-გაზეთებში.