ალეკო შენგელია ქართველ პოეტთა იმ პლიადას ეკუთვნის, რომლებმაც თავი მოიყარეს ჟურნალ „ჩვენი თაობის“ გარშემო. ესენი იყვნენ: რევაზ მარგიანი, ლადო ასათიანი, მირზა გელოვანი, გაბრიელ ჯაბუშანური, ალექსანდრე საჯაია. სწორედ ეს ჟურნალი იყო ალეკო შენგელიას, ჯერ კიდევ თბილისის სახელმწიფო უნივერსიტეტის ფილოლოგიის სტუდენტის პირველი ლექსის მეკვლე. სწორედ მან ამცნო მკითხველს განსხვავებული ხმის მქონე პოეტის დაბადება.

ალეკო შენგელიამ პირველი წიგნი 1940 წელს გამოაქვეყნა. ამას მოჰყვა ლექსებისა და პოემების კრებულები: „გაზაფხულის სიმღერები“, „მე მიყვარს“, „ლექსები“, „რჩეული“, „ლექსები და პოემები“, „დღეები“, „ოცნებები და ნაფეხურები“, „საბავშვო ლექსები და პოემები“ და სხვა. პოეტის მრავალი ლექსი გაითავისა მკითხველმა, მრავალი მათგანი სიმღერად აქცია და გაახალხურა.

წყარო: ვიკიპედია