უცებ მოედანზე ქარივით შემოიჭრა ზურმუხტისფერი ჯიზერი.  მასზე სანტა კლაუსი შემომჯდარა. ეს რა ხდება? სანტა მოქალაქეების წინაშე ასე არასოდეს წარმდგარა, ირმებს ფეხით მოუძღვოდა ხოლმე, მერე კი სათითაოდ ჯადოსნურ მარხილში შეაბამდა და თვითონაც მარხილში ჩაბრძანდებოდა.  ახლა კი  სახე გაფითრებია, შიში და მრისხანება ეტყობა. ჯიზერი ფრთხვინავს და წინა ფეხებს მიწას ბრაზით ურტყამს.

-სანტა, რა მოხდა?-ყველამ ერთად ამოიგმინა.

-კომეტა სადაა?

-სადაა ჩვენი პატარა, ვერცხლისფერი ირემი?

როცა თავის მოქალაქეებს  ახალი და თავზარდამცემი ამბავი ამცნო, სანტას ხმა უკანკალებდა:

-კომეტა არსად ჩანს...   დაიკარგა...ან  იქნებ... გაიტაცეს!

ყველა იქ მყოფი შიშმა და  აღშფოთებამ მოიცვა.  ეს გრძნობები  მალე მწუხარებაში გადაიზარდა. ასეთი რამ აქამდე არასოდეს მომხდარა. რა ელის მსოფლიოს? ხვალ როგორი ახალი წელი გაუთენდება?

-ეს ვინ გაბედა? ჩვენი  კომეტა ვინ გაიტაცა? როგორ? რანაირად?

-ამ რვა ირემს ერთიც რომ დააკლდეს, მსოფლიო მოგზაურობა ვერ შედგება!

-მოვასწრებთ  კი კომეტას მოძებნასა და დაბრუნებას?

-ჩვენ ხომ ჯერ ისიც არ ვიცით, სინამდვილეში რა მოხდა!

-ამას ახლავე გავიგებთ!-დაიძახა ბიჭუნა იუკიმ. თავისი საოცარი  გამოგონებების წყალობით მას მთელი ლაპლანდია იცნობდა,-ჩემს ახალ გამოგონებაზე მუშაობა სწორედ გუშინ დავასრულე...

-რა  გამოგონებაა, იუკი?

- მე ამას წარსულის მზვერავს დავარქმევდი, ჯიბის კომპიუტერივითაა.

იუკიმ  სასწრაფოდ ამოაძვრინა ჩანთიდან  მინიკომპიუტერი პაწია კლავიატურაზე  ტექსტი აკრიფა: ერთი საათის წინათ, კომეტას სადგომში...