Kids.ge-ს ბავშვთა განათლებისა და განვითარების ცენტრში ფსიქოლოგიური მომსახურება განკუთვნილია ძირითადად 3-დან 16 წლამდე ბავშვებისა და მათი მშობლებისთვის. 

ფსიქოლოგთან მიმართვის მიზეზი ყოველთვის მკვეთრად გამოხატული სირთულე არ არის. ზოგჯერ ოჯახს სჭირდება დახმარება ბავშვის ქცევის, ემოციების ან ურთიერთობების უკეთ გასაგებად, ზოგჯერ ბავშვს უჭირს ახალ გარემოსთან შეგუება, სწავლაზე კონცენტრაცია, თანატოლებთან ურთიერთობა ან რთულ ცხოვრებისეულ მოვლენასთან გამკლავება.

ფსიქოლოგიური მუშაობის მიზანი თითოეული ბავშვისა და ოჯახის საჭიროებების შესაბამისად განისაზღვრება. ის შეიძლება მოიცავდეს კონსულტირებას, ფსიქოლოგიურ მხარდაჭერას, კონკრეტულ სირთულეზე მუშაობას ან ხანგრძლივ თერაპიულ პროცესს.

რა მიმართულებებით ვმუშაობთ

ჩვენს ცენტრში ბავშვთა ფსიქოლოგები მუშაობენ სხვადასხვა მიმართულებით. კონკრეტული სპეციალისტი შეირჩევა ბავშვის ასაკის, საჭიროებისა და იმ საკითხის მიხედვით, რის გამოც ოჯახი მოგვმართავს.

ემოციური სფერო

ფსიქოლოგთან მუშაობის მიზეზი შეიძლება იყოს:

• შიში და შფოთვა;
• ხშირი გაღიზიანება და ბრაზი;
• ემოციების ამოცნობისა და გამოხატვის სირთულე;
• რთული ემოციების მართვა;
• დაბალი თვითშეფასება;
• თავდაჯერებულობის ნაკლებობა;
• სიმორცხვე;
• სტრესთან გამკლავების სირთულე;
• იმედგაცრუებისა და წარუმატებლობის მიღების სირთულე;
• განშორებასთან დაკავშირებული სირთულეები;
• ცვლილებებთან და ახალ გარემოსთან შეგუება.

მუშაობის მიზანია ბავშვს დაეხმაროს უკეთ გაიგოს საკუთარი ემოციები, თანდათან შეიძინოს მათი გამოხატვისა და მართვის უფრო ეფექტური გზები და უკეთ შეძლოს სხვადასხვა ემოციურ სიტუაციასთან გამკლავება.

ქცევითი სირთულეები

ფსიქოლოგიური მუშაობა შესაძლებელია მაშინაც, როდესაც ბავშვის ქცევა გარკვეულ სირთულეებს ქმნის მისთვის, ოჯახისთვის ან გარემოსთან ურთიერთობისას.

მათ შორის შეიძლება იყოს:

• ძლიერი და ხშირი ემოციური რეაქციები;
• წესებისა და შეთანხმებების დაცვის სირთულე;
• იმპულსური ქცევა;
• აგრესიული ქცევა;
• წინააღმდეგობრივი ქცევა;
• თვითკონტროლის სირთულე;
• ქცევის მკვეთრი ან ხანგრძლივი ცვლილება.

ასეთ შემთხვევებში მნიშვნელოვანია არა მხოლოდ თავად ქცევაზე რეაგირება, არამედ იმის გაგებაც, რა დგას ამ ქცევის უკან და რა საჭიროებას გამოხატავს ბავშვი მისი საშუალებით.

ამ პროცესში ხშირად მნიშვნელოვანია მშობელთან მუშაობაც.

სოციალური უნარები და ურთიერთობები

ბავშვს შეიძლება დახმარება სჭირდებოდეს თანატოლებთან ურთიერთობის, ჯგუფში საკუთარი ადგილის პოვნის ან საკუთარი ინტერესების დაცვის დროს.

ფსიქოლოგიური მუშაობა შეიძლება ეხებოდეს:

• თანატოლებთან ურთიერთობას;
• დამეგობრების სირთულეს;
• ჯგუფში ჩართვას;
• კომუნიკაციის უნარებს;
• საკუთარი აზრისა და სურვილების გამოხატვას;
• პირადი საზღვრების გაცნობიერებასა და დაცვას;
• სხვისი საზღვრების პატივისცემას;
• კონფლიქტებთან გამკლავებას;
• ემპათიის განვითარებას;
• ბულინგთან დაკავშირებულ სირთულეებს.

აკადემიური და შემეცნებითი უნარები

ფსიქოლოგიური მუშაობის ერთ-ერთი მიმართულებაა იმ უნარების განვითარება, რომლებიც ბავშვს სწავლასა და სასწავლო პროცესში მონაწილეობაში ეხმარება.

მუშაობა შეიძლება ეხებოდეს:

• ყურადღებასა და კონცენტრაციას;
• მეხსიერებას;
• აღქმას;
• დავალებაზე მუშაობის ორგანიზებას;
• დაწყებული სამუშაოს დასრულებას;
• ინსტრუქციის გაგებასა და შესრულებას;
• სასწავლო პროცესში დამოუკიდებლობას;
• დროისა და სამუშაოს ორგანიზებას;
• სწავლის მოტივაციას;
• შეცდომისა და წარუმატებლობის მიმართ დამოკიდებულებას;
• სასწავლო პროცესთან დაკავშირებულ შფოთვას;
• საკუთარი შესაძლებლობების მიმართ თავდაჯერებულობას.

ამ მიმართულებით მუშაობა არ გულისხმობს კონკრეტული სასკოლო საგნის რეპეტიტორობას. მისი მიზანია იმ შემეცნებითი, ემოციური და ქცევითი უნარების გაძლიერება, რომლებიც ბავშვს სწავლაში ეხმარება.

რთული ცხოვრებისეული მოვლენები და ტრავმული გამოცდილებები

ზოგჯერ ბავშვსა და ოჯახს ფსიქოლოგიური მხარდაჭერა განსაკუთრებით სჭირდება მნიშვნელოვანი ან რთული ცხოვრებისეული მოვლენების დროს.

ჩვენს გუნდში შესაძლებელია მუშაობა ისეთ საკითხებზე, როგორიცაა:

• ოჯახის წევრის ან ახლობელი ადამიანის დაკარგვა;
• მშობლების დაშორება ან ოჯახში მნიშვნელოვანი ცვლილება;
• საცხოვრებელი ადგილის, სკოლის ან გარემოს შეცვლა;
• მძიმე ავადმყოფობა ოჯახში;
• ძლიერი სტრესული გამოცდილება;
• ტრავმული გამოცდილებები;
• სხვა მოვლენები, რომლებმაც მნიშვნელოვანი გავლენა მოახდინა ბავშვის ემოციურ მდგომარეობაზე.

რთული და ტრავმული გამოცდილებების შემთხვევაში განსაკუთრებული მნიშვნელობა ენიჭება შესაბამისი გამოცდილებისა და პროფესიული კომპეტენციის მქონე სპეციალისტის შერჩევას.

მშობლის კონსულტაცია

ფსიქოლოგთან მისასვლელად აუცილებელი არ არის, რომ შეხვედრაში ყოველთვის ბავშვიც მონაწილეობდეს.

მშობელს შეუძლია ფსიქოლოგთან ცალკე კონსულტაციაზე მოსვლა, როდესაც სურს უკეთ გაიგოს ბავშვის ქცევა, ემოციური მდგომარეობა ან ურთიერთობის სირთულე და მიიღოს პროფესიული დახმარება შემდგომი მოქმედებების დაგეგმვაში.

მშობლის კონსულტაცია შეიძლება ეხებოდეს:

• რთულ ქცევასთან გამკლავებას;
• ოჯახში წესებისა და საზღვრების ჩამოყალიბებას;
• ბავშვის ემოციებზე რეაგირებას;
• მშობელსა და ბავშვს შორის კომუნიკაციას;
• კონფლიქტურ სიტუაციებს;
• და-ძმებს შორის ურთიერთობას;
• ბავშვის დამოუკიდებლობის განვითარებას;
• საბავშვო ბაღთან ან სკოლასთან ადაპტაციას;
• ოჯახში მნიშვნელოვან ცვლილებებს;
• ბავშვის ასაკთან დაკავშირებულ სხვადასხვა საკითხს.

მშობელთან მუშაობა ხშირად ბავშვის ფსიქოლოგიური პროცესის ნაწილიც არის.

როგორ იწყება მუშაობა

ფსიქოლოგთან მუშაობა იწყება პირველადი კონსულტაციით.

პირველი შეხვედრა ჩვეულებრივ უფრო ვრცელია და მისი მთავარი მიზანია არსებული მდგომარეობის გაცნობა, ოჯახის მიმართვის მიზეზის გააზრება და შემდგომი მუშაობის დაგეგმვა.

შემთხვევის მიხედვით პირველადი კონსულტაცია შეიძლება მოიცავდეს:

• მშობელთან საუბარს;
• ბავშვის გაცნობასა და მასთან საუბარს;
• ბავშვის განვითარების, ქცევისა და ემოციური მდგომარეობის შესახებ ინფორმაციის შეგროვებას;
• არსებული სირთულეების განხილვას;
• სამუშაო მიზნების განსაზღვრას;
• შემდგომი შეხვედრების ფორმატისა და მიმართულების დაგეგმვას.

ყველა შემთხვევა განსხვავებულია, ამიტომ პირველადი შეხვედრის ზუსტი ფორმატიც ინდივიდუალურად განისაზღვრება.

შემდგომი სამუშაო შეხვედრები უკვე უფრო კონკრეტულად იმ მიზნებზეა ორიენტირებული, რომლებიც პირველადი კონსულტაციის დროს გამოიკვეთა.

ინდივიდუალური ფსიქოლოგიური მუშაობა

ინდივიდუალური შეხვედრების რაოდენობა წინასწარ ყველა ბავშვისთვის ერთნაირად ვერ განისაზღვრება.

ზოგიერთ შემთხვევაში შესაძლებელია რამდენიმე შეხვედრაც საკმარისი იყოს კონკრეტული საკითხის გასააზრებლად და შემდგომი ნაბიჯების დასაგეგმად. სხვა შემთხვევაში კი ბავშვის საჭიროებებიდან გამომდინარე მიზანშეწონილია უფრო ხანგრძლივი და თანმიმდევრული ფსიქოლოგიური ან თერაპიული მუშაობა.

ჩვენს გუნდში სპეციალისტებს განსხვავებული პროფესიული მიმართულებები და გამოცდილება აქვთ. მათ შორის არიან სპეციალისტები, რომლებიც მუშაობენ ემოციურ, სოციალურ და ქცევით საკითხებზე, აკადემიურ და შემეცნებით უნარებზე, რთულ და ტრავმულ გამოცდილებებზე, ასევე ხანგრძლივ თერაპიულ პროცესებზე.

ზოგიერთი სპეციალისტი დამატებით გადის გეშტალტ-თერაპიის პროფესიულ მომზადებას და შესაბამის მიდგომებს იყენებს საკუთარი მომზადებისა და კომპეტენციის ფარგლებში.

კონკრეტული სპეციალისტის შესახებ ინფორმაცია წარმოდგენილი იქნება მის ინდივიდუალურ გვერდზე.

ჯგუფური მუშაობა

ინდივიდუალური კონსულტაციების გარდა, ცენტრში შესაძლებელია ჯგუფური ფსიქოლოგიური და განმავითარებელი მუშაობაც იმ საკითხებზე, რომელთა ჯგუფურ ფორმატში დამუშავება მიზანშეწონილია.

ჯგუფური მუშაობა შეიძლება ეხებოდეს, მაგალითად:

• ემოციური ინტელექტის განვითარებას;
• სოციალური უნარების განვითარებას;
• კომუნიკაციასა და თანამშრომლობას;
• საკუთარი აზრისა და ემოციების გამოხატვას;
• თვითშეფასებასა და თავდაჯერებულობას;
• ჯგუფში ურთიერთობასა და ადაპტაციას.

ჯგუფის მიზანი, ასაკობრივი შემადგენლობა და სამუშაო ფორმატი კონკრეტული პროგრამის შესაბამისად განისაზღვრება.

ფსიქოლოგიური შეფასება და რეფერირება

Kids.ge-ში ამ ეტაპზე ფორმალური ფსიქოლოგიური დიაგნოსტიკა და სპეციალიზებული ფსიქოდიაგნოსტიკური შეფასება არ ტარდება.

თუ პირველადი კონსულტაციის ან მუშაობის პროცესში გამოიკვეთა ასეთი შეფასების საჭიროება, ოჯახს ვთავაზობთ შესაბამის სპეციალისტთან, ცენტრთან ან ორგანიზაციასთან მიმართვას.

ასევე, თუ ბავშვის საჭიროება სცდება კონკრეტული ფსიქოლოგის ან ჩვენი ცენტრის პროფესიული მუშაობის ფარგლებს, ხდება შესაბამისი რეფერირება სხვა სპეციალისტთან ან ორგანიზაციასთან.

ჩვენთვის მნიშვნელოვანია, რომ ბავშვმა მიიღოს სწორედ ის მომსახურება, რომელიც კონკრეტულ შემთხვევაში სჭირდება, მიუხედავად იმისა, შესაძლებელია თუ არა მისი სრულად მიღება ჩვენს ცენტრში.

შეხვედრების ფორმატი

ფსიქოლოგთან შეხვედრები შესაძლებელია:

• პირისპირ, ჩვენს ცენტრში
• ონლაინ ფორმატით

კონკრეტული შემთხვევისთვის ფორმატის მიზანშეწონილობა ბავშვის ასაკის, საჭიროებისა და სამუშაო მიზნების გათვალისწინებით განისაზღვრება.

ონლაინ ფორმატით შესაძლებელია როგორც მშობლის კონსულტაცია, ისე შესაბამის შემთხვევებში სხვა სახის ფსიქოლოგიური მუშაობა.

შეხვედრების საფასური

პირველადი კონსულტაცია - 70 ლარი

პირველადი შეხვედრა მოიცავს შემთხვევის გაცნობას, მშობელთან და საჭიროების შესაბამისად ბავშვთან საუბარს და შემდგომი მუშაობის დაგეგმვას.

შემდგომი ინდივიდუალური შეხვედრა - 50 ლარი

შემდგომი შეხვედრები მიმდინარეობს პირველადი კონსულტაციის დროს განსაზღვრული მიზნებისა და სამუშაო გეგმის შესაბამისად.

ჩაწერა და დამატებითი ინფორმაცია

ფსიქოლოგთან პირველადი კონსულტაციის დასაგეგმად ან დამატებითი ინფორმაციის მისაღებად დაგვიკავშირდით.

მისამართი: თბილისი, პეკინის გამზ. 36
ტელეფონი: 591 42 11 00