ორშაბათს ტყის ლამაზ მდელოზე ერთი თაგუნა გამოცუნცულდა:

-რა ლამაზი  მდელოა! მოდი, აქ სახლს ავიშენებ! 

- სახლი მყარად უნდა იდგეს.  ამისთვის  ჯერ მიწა უნდა გაითხაროს. ამას ჩემისთანა პატარა თაგვი როგორ შეძლებს? 

უცებ მიწიდან თხუნელა ამოძვრა:

-მეგობარო, გავიგე შენი ნათქვამი! თურმე სახლის აშენებას აპირებ. მე დაგეხმარები!

სახლია აშენება დაწყებულია. მიწა უკვე გათხრილია. საქმე მაინც ბევრია.  მეგობრები ძალიან დაიღალნენ.

- ქვიშას და ცემენტს  ვინ მოზიდავს? დუღაბს ვინ მოზელს? ტყიდან მორებს ვინ გამოიტანს? სახლის კედლებს ვინ ამოიყვანს? ვინ გადახურავს? იატაკს ვინ დააგებს? სახლს ხომ კარიც უნდა და ფანჯარაც.... ამდენ საქმეს ვინ გააკეთებს?

სამშაბათს მდელოზე სპილომ  გამოაბოტა: 

-რა ლამაზი მდელოა! მეგობრებო,  სახლს აშენებთ? მე დაგეხმარებით!

ქვიშა და ცემენტი მოტანილია.  დუღაბი  უკვე მოზელილია. საქმე მაინც ბევრია.  მეგობრები ძალიან დაიღალნენ:

ოთხშაბათს მდელოზე დათუნა გამობაჯბაჯდა:

-რა ლამაზი მდელოა!  მეგობრებო, სახლს აშენებთ? მე დაგეხმარებით!

ტყიდან მორები მოზიდულია, სახლის კედლები უკვე ამოყვანილია. საქმე მაინც ბევრია. მეგობრები ძალიან დაიღალნენ:

ხუთშაბათს მდელოზე ჟირაფი გამობაკუნდა:

-რა ლამაზი მდელოა, მეგობრებო, სახლს აშენებთ? მე  დაგეხმარებით!

სახლი გადახურულია. იატაკი უკვე დაგებულია. საქმე მაინც ბევრია.  მეგობრები ძალიან დაიღალნენ:

პარასკევს მდელოზე მელია  გამოცუნცულდა:

-რა ლამაზი სახლია! მეგობრებო, მეც დაგეხმარებით!

კარები დაყენებულია. სახლს უკვე  ფანჯრებიც აქვს.  საქმე მაინც ბევრია.  მეგობრები ძალიან დაიღალნენ:

-კედლებს ვინ შეღებავს?  მდელოს ვინ შემოღობავს? ეზოში ყვავილებს ვინ დარგავს? უჰ, რამდენი საქმეა!

შაბათს მდელოზე პეპლები გამოფარფატდნენ, ფუტკრები გამოზუზუნდნენ:

-რა ლამაზი მდელოა! რა ლამაზი სახლია! ჩვენ დაგეხმარებით!

რა კარგი ყოფილა ერთად მუშაობა! აი,  სახლის კედლები შეღებილია. ეზო შემოღობილია.  ყვავილებიც უკვე დარგულია.  საქმე მაინც ბევრია.  მეგობრები ძალიან დაიღალნენ.

ნუთუ, ღამემ ასე იჩქარა!   როგორ ჩამობნელდა! 

-უჰ, ვერაფერს ვხედავთ!  სახლს ვინ გაანათებს?

უცებ  ციცინათელები მოციმციმდნენ:

-ჩვენ აქ არა ვართ? დაგეხმარებით! გაგინათებთ!

კვირა დღეა. მეგობრები წვეულებისთვის ემზადებიან. მათ ხომ დიდი  სახლი ააშენეს! 

ტყიდან ჩიტები გამოფრთხიალდნენ:

-რა ლამაზი მდელოა! ეს  რა ლამაზი სახლი აგიშენებიათ!  შეიძლება ამ ეზოში ვიცხოვროთ?  ჩვენ ყოველდღე  გიმღერებთ!

-მობრძანდით! სულ ჭიკჭიკით იცხოვრეთ!

რა  კარგია! ცხოვრება ისეთი  მხიარულია! ეს იმიტომ, რომ მეგობრები ერთად არიან! ერთად ყოფნას ქვეყნად ვერაფერი  შეედრება. 

-ერთად ვიშრომეთ!  სახლი ერთად  ავაშენეთ! 

ყველანი აქ არიან. მარტო ციცინათელები არ ჩანან.  ისინი ახლა  სახლის ჭერქვეშ ისვენებენ.

-ძალიან ნუ ვიხმაურებთ, მეგობრებო! ჩვენი ციცინათელები მთელი ღამე ციმციმებდნენ.  სახლსა და ეზო-ყურეს გვინათებდნენ. ნუ გავაღვიძებთ! დაისვენონ!