მანანა წერეთელი დაიბადა თბილისში, 1960 წლის 27 მარტს. 1977 წელს დაამთავრა თბილისის მე-14 საშუალო სკოლა, ხოლო 1985 წელს – თბილისის ივ. ჯავახიშვილის სახელობის სახელმწიფო უნივერსიტეტის დასავლეთ ევროპის ენებისა და ლიტერატურის ფაკულტეტი, შემდეგ – რელიგიის ისტორიის ფაკულტეტი. 1985-1994 წლებში მუშაობდა ამავე უნივერსიტეტის საინფორმაციო-გამოთვლით ცენტრში, 1994 წლიდან – ჟურნალ „საქართველოს სამედიცინო მოამბის” რედაქციაში კორესპონდენტად, 1996 წლიდან – გაზეთი „მედიცინის" კორესპონდენტად, 2000-2005 წლებში ამავე გაზეთის პასუხისმგებელ მდივნად, შემდეგ კი - რედაქტორის მოადგილედ. ხელმძღვანელობდა რამდენიმე რუბრიკას, მათ შორის: „მართლმადიდებლის კუთხე“, „ჩვენი სტუმარი“, „მედიკოსები ხელოვნებაში“ და სხვა.

გამოქვეყნებული აქვს პუბლიცისტური, მხატვრული და შემეცნებითი წერილები პერიოდულ პრესაში.

გამოცემული აქვს წიგნი: „ცისა, ლექსო და ეს სამყარო". საბავშვო მოთხრობა „სიკეთის მზე“ დაიბეჭდა წიგნში სერიით „ქართული საუნჯე ბავშვებს“, ხოლო სამი მოთხრობა -  პერიოდულ ჟურნალ „დილაში“. მოთხრობა „წრიპისა და წრუპის უჩვეულოდ თბილი ზამთარი“ დაიბეჭდა საკონკურსო წიგნში „ბუკნაჭო“.