ბუბუნას  ყველა იცნობს. ის დევია.

ჰო, დევია, მაგრამ ძალიან კეთილი.

კეთილი დევი ვის გაუგონიაო?- დიდი და პატარა გაკვირვებით მხრებს იჩეჩავს.

რა ვქნა, ჩვენი ბუბუნა  სწორედ ასეთია.

თანაც მას ძალიან უყვარს ბავშვები.

ბუბუნა  ჯადოსნურ ქუჩაზე -კრისტალ როუდზე ცხოვრობს.  კრისტალ როუდი ზღაპრული არსებების ქუჩაა.  ამაზე უკეთესს ვერსად ვერაფერს ნახავთ.  ზღაპრების მოყვარული ბავშვები  ბუბუნას   ხშირად სტუმრობენ, მერე მასთან ერთად კრისტალ-როუდზე დასეირნობენ.

შენც მოგინდა კრისტალ-როუდზე გასეირნება? ეს რომ შეძლო, ბევრი ზღაპარი უნდა იცოდე.

რა თქმა უნდა, ჯადოსნურ ქუჩაზე ჯადოქრებსაც შეხვდებით. მათგან ზოგი კეთილია, ზოგი კი ძალიან ავი. 

ერთხელ კეთილი ჯადოქარი,  ბებია ბუცა  შვილიშვილებთან გაემგზავრა. თავისი ჯადოსნური ჯოხი შესანახად მან ბუბუნას  მიაბარა. სწორედ ამ დროს ბუბუნას  ბავშვები ესტუმრნენ. კრისტალ-როუდზე დიდი აურზაური დაიწყო. თურმე ბუბუნამ  ბებია  ბუცას ჯადოსნური  ჯოხი აიქნია და ციდან კამფეტების წვიმა დაუშვა. 

ხმაურზე სახლიდან ავი ჯადოქარი-ბაბუა უშა  გამოვარდა. 

-ახლავე გაჩუმდით!-დაიღრიალა ბაბუა უშამ.

ვინ მოუსმინა. ბაბუა უშა უფრო გაბრაზდა და თავისი ჯადოსნური ჯოხი ბავშვებისკენ გაიშვირა: 

-ეს ბავშვები აქედან შორს, ზღაპარ- პოლუსზე წაიყვანე!

ბავშვები უცებ ზღაპარ-პოლუსზე გაჩნდნენ, იქ კი საშინლად ციოდა. ბავშვებმა ვერც შეშინება მოასწრეს, ვერც ატირება, რადგან კრისტალ-როუდზე ბუბუნამ  სასწრაფოდ ჯადოსნური ჯოხი  აიქნია:

-ბავშვები ახლავე აქ გაჩნდნენ! ახ-ლა-ვე!

ამის თქმა და ბავშვები წამსვე კრისტალ-როუდზე აღმოჩნდნენ. რა კარგად მოიქცა  ბებია ბუცა,  ბუბუნას  რომ თავისი ჯოხი დაუტოვა, ალბათ გულმა უგრძნო.

ბაბუა უშა უფრო განრისხდა. ჯერ კუდიანივით დაბზრიალდა, მერე ჯოხი უფრო მაღლა აღმართა:

-ბავშვები სასწრაფოდ...

მაგრამ ავმა ჯადოქარმა ბრძანების დასრულება ვერ მოასწრო, ბუბუნა  მივარდა და მას ჯოხი  მკერდზე მიადო, გულთან ახლოს:

-ბაბუა უშა კეთილი გახადე!

ბაბუა უშა უცებ კეთილი გახდა.  ბავშვებს ალერსიანი მზერით შეხედა და უთხრა:

-აბა, ვის უნდა ბამბის ნაყინის თოვლი! ახლავე გავაჩენ! მოდით, დღეს კრისტალ-როუდზე დიდი ზეიმი მოვაწყოთ! 

აი, ასეთია ჩვენი კეთილი დევი, -ჩვენი ბუბუნა!