გივი ჩიღვინაძე დაიბადა საჩხერის რაიონის სოფელ მოხვაში 1960 წლის 20 მარტს. დაამთავრა თბილისის სახელმწიფო უნივერსიტეტის ფილოლოგიის ფაკულტეტი. მუშაობდა გამომცემლობებსა და რედაქციებში, დღეს გამომცემლობა „საუნჯის“ რედაქტორია.
მისი ლექსები, მოთხრობები, საბავშვო ნაწარმოებები და ისტორიული გამოკვლევები დიდი ხანია იბეჭდება ქართულ სალიტერატურო, საბავშვო და საისტორიო ჟურნალ-გაზეთებში, შესულია სხვადასხვა კრებულებში, გამოდის ცალკე წიგნებად.
არის ლიტერატურულ კონკურს „პენ-მარათონის“ ოთხგზის ფინალისტი და პრიზიორი, ლიტერატურულ კონკურს „ლექსების გამოფენის“ ოთხგზის ფინალისტი, რეზო ინანიშვილის სახელობის ლიტერატურული კონკურსის ხუთგზის ფინალისტი, გოდერძი ჩოხელის სახელობის ლიტერატურულ კონკურს „ერთგულების“ სპეციალური პრიზის მფლობელი, ლიტერატურულ კონკურს „ემიგრანტის წერილის“ გამარჯვებული, ლიტერატურულ კონკურს „თუთას“ ფინალისტი, ლიტერატურულ ფესტივალ „წმინდა ნინოს ჯვრის“ ორგზის გამარჯვებული, საბავშვო ლექსების კონკურს „ბუკნაჭოს“ გამარჯვებული (პირველი ადგილი), იაკობ გოგებაშვილის პრემიის ლაურეატი. არის საჩხერის საპატიო მოქალაქე.
გამოცემული აქვს მოთხრობებისა და ლექსების კრებულები, საბავშვო წიგნები და ისტორიული გამოკვლევები.