kids.ge logo

კესო-პეპელა

ფავორიტებში დამატება

კესო-პეპელას ვარდისფერი  ფრთები  წითელი წინწკლებით აქვს მოხატული. ჭრელაჭრულა ყვავილები ამბობენ, ამ არემარეში მასზე ლამაზი არსება არ დაფრინავსო. მინდორში ყველა ყვავილი მხოლოდ იმაზე ოცნებობს, კესო-პეპელამ მის ფურცლებზე ერთხელ მაინც ჩამოჯდეს,  ამით  თავი რომ  მოიწონონ. 

მინდვრის განაპირას ყვითელი ნარგიზი დგას, პაწია მზეთუნახავს პირველად ის დაინახავს, დაიძახებს:

-კესო-პეპელა მოდის, კესო-პეპელა!

ყვავილები მაშინვე  ფურცლებს შლიან და კესო-პეპელას ტკბილ საუზმეს სთავაზობენ. მინდორში ათასნაირი ყვავილი გაშლილა. კესო-პეპელა კი ერთი პაწია არსებაა.  არ უნდა ვინმეს გული დასწყვიტოს.  თვალებს ხუჭავს და ყვავილს ისე ირჩევს. 

მინდორი ვრცელია, შორს გაშლილი. ზოგჯერ კეთილი ნიავბიჭუნა შემოირბენს, კესო-პეპელას ფრენაში ეხმარება. 

ერთხელ მინდორს ძლიერმა ქარმა გადაუქროლა, მერე გადმოუქროლა.

-კესო-პეპელა! თავს უშველე, თორემ  ქარი წაგიღებს! -დაიძახეს ყვავილებმა. 

მაგრამ ქარმა პაწია მზეთუნახავი  უკვე დაინახა,  მისკენ ღმუილით დაიძრა.  

-იჩქარე, კესო-პეპელა! მოდი, ჩემს პარკუჭანაში დაგმალავ!-დაუძახა ერთმა ყვავილმა. კესო- პეპელამ  ძლივს მოსწრო ჩამოფრენა, ყვავილმა  პარკუჭანა სასწრაფოდ დახურა და კესო-პეპელა  გულში ჩაიკრა. ქარი მთელი დღე უტრიალებდა, ხან მარჯვნივ ააფრიალა, ხან მარცხნივ.   ყვავილს მწვანე პარკუჭანა ისე  შეეკრა,  პირი ვერაფრით  გაახსნევინა. 

ღამით  გაწვიმდა. ქარი  მინდვრიდან ლაჩრულად გაიძურწა.

-ნეტავ, ჩვენი კესო -პეპელა როგორაა!-მთელი ღამე დარდობდნენ ყვავილები.   

წვიმამ  გადაიღო. დილით მზე ცაზე არხეინად გამობრძანდა. ყვავილმა მწვანე პარკუჭანა ფრთხილად გაშალა. კესო-პეპელამ  მის გულზე ჯერ მუხლი გამართა, მერე ფრთები აიქნია და აფრინდა. 

ყვავილებმა ერთხმად დასცხეს ტაში. მზე გაოცდა, ვერ მიხვდა, მინდორზე რა ხდებოდა. 

-დიდი მადლობა, ჩემო გმირო!-უთხრა მამაც ყვავილს კესო-პეპელამ. 

ყვავილს შერცხვა, დაიბნა.  თავისი პარკუჭანა უნებურად დღის სინათლეშიც კი შეკრა. გაოცებულმა მზემ ცხრავე თვალი დააჭყიტა, მაინც ვერაფერს მიხვდა.

ჯერ არცერთ მომხამრებელს არა აქვს შეფასება გაკეთებული. თქვენ როგორ გფიქრობთ, რა ასაკის ბავშვისათვის შეიძლება იყოს ეს $work_type საინტერესო? საორიენტაციო ასაკის მისანიჭებლად, გთხოვთ შეხვიდეთ სისტემაში ან გაიაროთ რეგისტრაცია და გვითხრათ, თქვენი აზრით რა ასაკის ბავშვისათვის არის ეს $work_type საინტერესო. თქვენი აზრი ჩვენთვის მნიშვნელოვანია!

ნახატი მოთხრობები

ამ ნაწარმოების თემაზე ბავშვებს მიერ შექმნილი ნახატები. თუ შენც გაქვს რაიმე დახატული, გაუზიარე ის სხვებს!

გამოგვიგზავნე შენი ნახატიც
 
სოფოს ბლოგი - სინათლის თაობა
სოფოს ბლოგი - სინათლის თაობა

უცნაურია,მაგრამ ვფიქრობ, ძირითადი მიზეზი, რის გამოც ვერ ვახერხებთ თანამედროვე თაობის გაგებას - ენერგიის ნაკლებობაა. ახალი თაობა ენერგეტიკულად იმდენად მაღალ სიხშ...

ყველა უფლება დაცულია.
kids.ge © 2011 - 2021