kids.ge logo

ზაფხულის ღამე

ფავორიტებში დამატება

ზაფხულის ერთ მშვენიერ  ღამეს პატარა გოგონა და მისი დედიკო ვარსკვლავებით მოჭედილ ცას შეჰყურებდნენ:

-რა კარგი ღამეა! -უთხრა დედამ გოგონას,-ხედავ? ერთმანეთს მიყრდნობილი ორი მთის მხრებიდან უუუუზარმაზარმა  მთვარემ ამოყო თავი. ამაღამ ბნელი ღამისა არ შეგვეშინდება.

-დე, ხედავ?  ის უუუუზარმაზარი მთვარე  ახლა ჩვენკენ მოდის,-დაიძახა გოგონამ,-თითქოს  ჩვენს ქუჩაზე მოაბიჯებს...მაღლა აიხედე! ცა ვარსკვლავებით მოჭედილა, მორთულა, განა მოწმენდილა.

-მართლა ძალიან ლამაზია!

-დე, ნახე, ერთი ვარსკვლავი როგორ გარბის!

-ეს ვარსკვლავი  კი არა,  ხელოვნური თანამგზავრია. ვარსკვლავებს დაჭერობანას ეთამაშება.

-ეს როგორ? ვარსკვლავს ხომ სირბილი არ შეუძლია.

-საქმეც ამაშია,-აუხსნა დედამ,-დაჭერობანას იმიტომ ეთამაშება, რომ ვარსკვლავებს სირბილი არ შეუძლიათ, თვლით კი იმიტომ ითვლის, რომ ყოველთვის თვითონ იყოს გამარჯვებული.

დედა-შვილი უყურებდა, თანამგზავრი ვარსკვლავებს შორის როგორ  დარბოდა და ითვლიდა:

-ენკი, ბენკი, სიკლისა, ენკი, ბენკი დაა... ხითხითელა პაკო გა-ვი-დააა!

მერე გათვლას მოუჩქარა:

--ენკი, ბენკი, სიკლისა, ენკი, ბენკი, დააა...   აი, უკვე  ბაკაც   გა-ვი-დაა!

მერე სულ გადაირია:

-ენკი, ბენკი, სიკლისა, ენკი, ბენკი, დააა... 

ვარსკვლავებს ძალიან ეწყინათ:

-ახლავე გაჩუმდი! ეს რა მანერებია! დაჭერობანას დახუჭობანას თამაში გვირჩევნია. ჩვენ ხომ სირბილი არ შეგვიძლია!

მაგრამ თანამგზავრი...ხომ არ ჩაიხვია, ნეტავი! ვარსკვლავებს უკვე ელვის სისწრაფით ითვლიდა:

-გასულია ანკაც, მაკაც, ნუცოც, ელაც, კიდევ ლელა-ბელაც,  კიდევ ცოკუ-ბოკუც, ესეც ფოკუს-მოკუს!

ღამემ დატუქსა:

-ახლავე გაეცალე აქაურობას, თორემ მე შენ გიჩვენებ, ორბიტიდან გასვლა როგორაც უნდა!

მართლა გაეცალა, ირმის ნახტომის მთავარი გზისკენ  გაუტია, მაგრამ განა რცხვენოდა, ნება-ნება მიღიღინებდა, ჩიტუნასავით მიტიტინებდა:

-მე კვლავ ბევრჯერ დაგეწვევით, თქვენ კი ვეღარ დამეწევით!

ღამემ გაიცინა. გაიცინეს ვარსკვლავებმაც. თანამგზავრი ხომ მეტად საჭიროა. ის ხომ ადამიანებმა იმიტომ შექმნეს, რომ ციური სხეულები უკეთ გაეცნოთ. ყველაზე მეტად ვინ იცინოდა? - რა თქმა უნდა, პაკო, ბაკა,  ანკა, მაკა, ნუცო, ელა,  ლელა-ბელა, ცოკუ- ბოკუ,  ფოკუს-მოკუს!  ხედავ, თანამგზავრმა რამდენი ახალი ვარსკვლავი აღმოაჩინა!

პატარა გოგონა დედას კალთაში ეჯდა  და ცას თვალს არ აშორებდა, ვარსკვლავების სახელებს იმახსოვრებდა:  პაკო, ბაკა, ანკა, მაკა, ნუცო, ელა, ლელა-ბელა, ცოკუ-ბოკუ, ფოკუს-მოკუს!

-შვილო, უკვე ძილის დროა!-უთხრა დედამ. 

-რას ამბობ, დედა, ძილში ხომ ახალი ვარსკვლავების სახელები სულ დამავიწყდება!

დედამ ღამეს გახედა, იმანაც თავი დაუქნია,-მე ვიცი და ჩემმა ღამეულობამო, მომკლა ამდენმა არეულობამო.

-ჩჩჩ, ჩჩჩუმად!-ძლივს გასაგონი ჩურჩული გაისმა. ეს ძილი იყო,  ღამის ვეზირი. დადიოდა  და ფერად-ფერადი სიზმრების ასხმულებს დაატარებდა. ძილი  ჩუმად მიიპარა და ვარსკვლავების თვლაში გართულ გოგონას  ხავერდოვანი თითები თვალებზე ნაზად ჩამოუსვა:

-ფოკუს-მოკუს!  იძინე, პატარავ, იძინე! აი, შენ ყველაზე ზღაპრული, ყველაზე საყვარელი სიზმარი!-კეთილად გაიღიმა და მძინარეს ლამაზი სიზმარი  მოახურა. 

სძინავს პატარა გოგონას. ძილში ტკბილად იღიმება. სახეზე სულ ვარსკვლავების ნათელი გადასდის. მისი სიზმრის შინაარსს ვინ არ მიხვდება,-თავის პატარა მეგობრებს  დახუჭობანას ეთამაშება! ყველანი აქ არიან: პაკო, ბაკა, ანკა, მაკა, ნუცო, ელა, ლელა-ბელა, ცოკუ-ბოკუ, ფოკუს-მოკუს!

ჯერ არცერთ მომხამრებელს არა აქვს შეფასება გაკეთებული. თქვენ როგორ გფიქრობთ, რა ასაკის ბავშვისათვის შეიძლება იყოს ეს $work_type საინტერესო? საორიენტაციო ასაკის მისანიჭებლად, გთხოვთ შეხვიდეთ სისტემაში ან გაიაროთ რეგისტრაცია და გვითხრათ, თქვენი აზრით რა ასაკის ბავშვისათვის არის ეს $work_type საინტერესო. თქვენი აზრი ჩვენთვის მნიშვნელოვანია!

ნახატი მოთხრობები

ამ ნაწარმოების თემაზე ბავშვებს მიერ შექმნილი ნახატები. თუ შენც გაქვს რაიმე დახატული, გაუზიარე ის სხვებს!

გამოგვიგზავნე შენი ნახატიც
 
Kids.ge-ს რჩევები

ნუ ეცდებით შვილების ნამოქმედარის შესწორებას

თუკი თქვენი შვილი საწოლს თავად ასწორებს, ნუ ეცდებით მის თავიდან გასწორებას. თუკი მას სურს ჩაიცვას ზოლებიანი და წერტილებიანი ტანისამოსი, შეაქეთ მისი „ეკლექტური“ სტილი. მხოლოდ საჭიროების შემთხვევაში შეუსწორეთ ბავშვს რაიმე ქმედება, ამბობს კეთი ბასი, საბავშვო ბაღის დირექტორი მორისვილში, პენსილვანიის შტატში. ბავშვს შეუძლია ეს შეამჩნიოს და ამან შეიძლება ხელი შეუშალოს მას.

ანი კაპანაძის ბლოგი - დაწყებითი კლასის მასწავლებელი
ანი კაპანაძის ბლოგი - დაწყებითი კლასის მასწავლებელი

„მასწავლებელი - ზოგჯერ უშვილო,მაგრამ ათასი ბავშვის მშობელი”   პირველად რომ წავიკითხე იოსებ ნონეშვილის ლექსი, „მასწავლებელი” საოცა...

ყველა უფლება დაცულია.
kids.ge © 2011 - 2024