ჩემო პატარებო, თქვენმა სიყვარულმა და თქვენზე ზრუნვამ დამაწერინა ეს ლექსები. მსურდა, ფრთხილად შემოვსულვიყავი თქვენს მეტად ფაქიზ და ნათელ სამყაროში, თქვენთან ერთად გამეგო ფრინველთა ენა, გამეზიარებინა მათი წუხილი და სიხარული, ასევე შემეცნო ყოველი ცოცხალი არსების შინაგანი ბუნება და ეს ყველაფერი ლექსად გარდამექმნა.
ვცადე, თქვენი თვალით დამენახა ის ჯადოსნური სამყარო, სადაც ერთმანეთს ესიყვარულებიან ფრინველები და ცხოველები, ნაკადულები და მცენარეები, სადაც მხოლოდ სიყვარული და თანხმიერება სუფევს. მართალია, ამ ჯადოსნურ სამყაროშიც გამოჩნდებიან ავისმქნელები, მაგრამ მე თქვენთან ერთად შევეცადე ბოროტებისაკენ მიდრეკილთათვის სიკეთე და ზნეობრიობა ჩამენერგებინა და დავხმარებოდი სწორი გზის არჩევაში.
თუ ოდნავ მაინც შევძელი თქვენთვის სიხარულისა და კმაყოფილების მონიჭება, თავს ბედნიერად ჩავთვლი.
